Alén Pérez
Redacción-BoiroNaRede
09-04-2013

Axentes adscritos ao cuartel da Garda Civil de Boiro detiveron onte a dous boirenses acusados de matar a machadazos a un cabalo no lugar de Agra de Loxo, nos arredores da parroquia de Comoxo, en Boiro.

Segundo informaron fontes do Instituto Armado, os imputados, pai e fillo de 49 e 30 anos de idade respectivamente, asasinaron a un cabalo dun veciño porque este entrara na súa finca en reiteradas ocasións tras escapar do lugar no que o seu dono o tiña amarrado e, segundo explicaron os detidos á Garda Civil, o animal xa tiña causado danos nas colleitas. Porén, os imputados non dubidaron en agarrar ao animal e agredilo, supostamente, cunha machada ata causarlle a morte.

Axentes da Benemérita explicaron a BoiroNaRede que non se descarta que o asasinato do animal fose motivado por problemas persoais entre o propietario do animal e os agresores.

Os detidos, que foron arrestados na súa propia vivenda despois de que a Garda Civil comprobase a veracidade dos feitos,  están acusados de maltrato e asasinato animal.

Os feitos foron postos en coñecemento do Xulgado de Instrucción Número Dous de Ribeira, que determinará a culpabilidade ou inocencia dos detidos.

Imaxe do cabalo falecido. FOTO: CEDIDA