BoiroNaRede - Noticias De Boiro - Falsa alarma aos servizos de emerxencia de Boiro

Redacción>Boiro>Alén Pérez
02-08-2012
redaccion.boironarede@gmail.com

Pasadas as 21:15 desta tarde-noite, a central do 112 Emerxencias Galicia con base na Estrada, era alertada por un particular dun suposto incendio no interior dunha vivenda ubicada na terceira planta do edificio número 118, na Rúa Principal.

Ao parecer, na chamada ao 112, a persoa alertante, anunciaba que saía abundante fume do interior dunha vivenda e se vía algo de lume. Polo cal, a central de emerxencias mobilizou un amplo dispositivo composto polo Grupo Municipal de Intervención Rápida de Boiro -Grumir-, Garda Civil e Policía Local de Boiro, dúas motobombas dos Bombeiros de Boiro con base en Espiñeira e tamén se alertou aos bombeiros do parque de Riveira, pero estes últimos deron volta pouco despois de saír.

Cando os corpos de seguridade e emerxencia chegaron ao lugar do suceso, efectivamente, saía fume dun dos pisos, tras entrar no edificio, comprobaron que se trataba dunha barbacoa que un veciño estaba a facer.

A Garda Civil obrigou ao individuo que apagara a barbacoa e, polo de agora, a redacción de BoiroNaRede descoñece si se lle impuxo ou imporá algunha sanción.

Cabe destacar a cantidade de persoas que se achegaron ao lugar dos feitos, dado a que é unha das rúas máis transitadas de Boiro. Entre as deceas de curiosos, atopábase o Alcalde de Boiro Juan José Dieste, que en canto se enterou do posible suceso se persoou no lugar dos feitos.

Momento de recollida do operativo. FOTO: Alén Pérez